× Popup image

#AJaishwarya status in Hindi, Gujarati, Marathi

  • #AJanand
    #AJaishwarya
    સુખનું સાથી દુઃખમાં ભાગીદાર રહેતું આંગણું મારું,
    સદા હસતું ફરિયાદ કોઈ દિવસ ન કરતું આંગણું મારું.

    શિયાળે ઠરતું ઉનાળે ધોમ ધખતાં તાપમાં એ તપતું,
    ચોમાસે તરબોળ કાગળની નાવને તરાવતું આંગણું મારું.

    સંધ્યા ટાણે ગમાણે ગાવડી આવતી દૂધ દોવાતું,
    પાટીએ પાકતું શાક સોડમ ચોતરફ ફેલાવતું આંગણું મારું.

    બહેનીની ઝાંઝરીયે ઘૂઘરીનાં ઘમકારે ઘમકતું,
    વસમી વિદાય ટાણે ઉદાસ થઈ મનોમન રડતું આંગણું મારું.

    નવોઢાના સ્વાગત સમયે ફૂલોથી સજ્જ થઈને રહેતું,
    કંકુપગલાં કરાવી છાપ એના હૈયે પડાવતું આંગણું મારું.

    મારી મા નો એકલતાનો સહારો એની સહિયર કહેવાતું,
    ચાર ચોટલા મળતાં ત્યારે વાતો ચૂપચાપ સાંભળતું આંગણું મારું.

    મમતાનો ખોળો મળ્યો પિતાનો સ્નેહ જ્યાં મળતો મને,
    મારા દાદા દાદીની સાત પેઢીની થાપણ કહેવાતું આંગણું મારું.

    -સચીન સોની.
    ૨૪-૦૧-૧૯

  • #AJarpit
    #AJaishwarya
    #AJdevanshi

    *લઘુકથા*
    કફન શબ્દ આંખની સામે આવતા આજે ફરીવાર, મારી સામે નાનપણનું એ દ્રશ્ય મારા દિલ અને દિમાગમાં ફરી આવી ગયું.

    અને ફરી પાછું એ તારું લાલચટક ઘરચોળું સ્મરણમાં આવી પહોંચ્યું,
    આમ તો મા મેં તારી સાથે અલ્પ સમય વિતાવ્યો છે,પણ નાનપણની એ ધૂંધળી યાદો હજુ પણ મારા સ્મરણમાં ક્યાંક એક ખૂણામાં જીવંત પડી છે.

    મોટી બહેનના લગ્ન પ્રસંગ વખતે તું એ ઘરચોળામાં સજ્જ અને બહું ખુશ દેખાતી હતી,તારા એ ઘરચોળાના કોઈ વખાણ કરતા તો તું બહું ખુશ થઈ જતી હતી,
    કારણ કે ઘરચોળું તને બહું ગમતું હતું,અને એ ઘરચોળા સાથે તે ઘણા બધા ફોટો પણ પડાવેલા.

    બહેનના લગ્ન ધામધૂમથી કર્યા પછી મા તને છ મહિના પછી એ કાળમૂખો હૃદય રોગનો હુમલો આવ્યો અને તે અમારી વચ્ચેથી વસમી વીદાય લીધી,અને તે દિવસે પણ મા તને એ તારા ગમતા ઘરચોળાને તારું કફન બનાવી તને ઓઢાળવામાં આવ્યું.

    અને ત્યારે મારા બાળ સહજ મનમાં એક સવાલ થયો?
    કે મા તને વહાલસોયા દીકરા કરતા તને એ ઘરચોળું વ્હાલું હતું,
    કારણ કે તું મને છોડી કફન બનેલા ઘરચોળાને સાથે લઈ ગઈ...

    -સચીન સોની